Tetesi za Usajili Yanga SC Dirisha Dogo 2026: Mashine Nyingine Kutua?
Licha ya kukamilisha baadhi ya usajili muhimu, klabu ya Young Africans (Yanga SC) bado inatajwa kuwa sokoni ikisaka saini za wachezaji wenye kiwango cha juu. Lengo kuu la kocha na uongozi ni kuhakikisha kikosi kinakuwa na upana wa kutosha kukabiliana na hatua ya makundi ya CAF Champions League na kutetea ubingwa wa Ligi Kuu ya NBC.
Wachezaji Wanaohusishwa na Yanga SC Dirisha Dogo
Hapa kuna orodha ya wachezaji ambao mazungumzo yao yanadaiwa kufikia hatua nzuri na huenda wakambulishwa hivi karibuni:
1. Romarica Moussou (ASEC Mimosas)
Kiungo mshambuliaji huyu fundi raia wa Benin, Romarica Moussou (24), anatajwa kuwa kwenye rada za mabingwa wa nchi. Moussou ambaye kwa sasa anatumikia klabu ya ASEC Mimosas ya Ivory Coast, anasifika kwa uwezo wake wa kupiga pasi za mwisho na kumiliki dimba. Usajili wake unalenga kuongeza ubunifu zaidi eneo la mbele kusaidia washambuliaji wa kati.
2. Gelson Dala (Angola)
Moja ya jina kubwa linalovuma ni mshambuliaji hatari wa timu ya taifa ya Angola, Gelson Dala. Inasemekana kuwa Kocha Pedro Gonçalves ana mpango wa kuleta mchezaji huyu mwenye uzoefu wa kimataifa ili kuongeza "makali" kwenye safu ya ushambuliaji. Dala anajulikana kwa kasi, uwezo wa kukaa na mpira, na ufungaji wa mabao muhimu katika michuano mikubwa.
3. Yona Amos (Pamba Jiji FC)
Katika kuimarisha idara ya walinda mlango, Yanga inatajwa kumuwania golikipa Yona Amos (26) kutoka Pamba Jiji FC. Amos anakuja kama mbadala wa muda mrefu wa Khomein Abubakar, ambaye amekuwa akikabiliwa na majeraha na kushuka kwa kiwango. Ujio wa Yona Amos utaleta ushindani mkubwa kwa makipa waliopo sasa kikosini.
Mpango wa Kupunguza Wachezaji
Tetesi hizi zinakwenda sambamba na mpango wa klabu kuwatoa kwa mkopo au kuachana na baadhi ya wachezaji ambao hawajapata muda mwingi wa kucheza msimu huu. Hii ni sehemu ya mkakati wa kutengeneza nafasi kwa ajili ya wachezaji wapya wa kigeni (Foreign quota) ambao watakuja kuongeza nguvu.
Je, ni mchezaji gani kati ya hawa ungependa kumuona akivaa uzi wa kijani na njano msimu huu?